Финн-угор кундемла гыч йоча-влак Марий Элышке лагерьышке толыныт. 18 гыч 24 август марте Марий Элыште финн-угор лагерьын черетан сменыже эрта. Ынде 15 ий почела финн-угор калык-влакын икшывыштлан Марий Элыште тӱнямбал лагерь эртаралтеш. Тений ты лагерьын сменышкыже мер пашаште шкеныштым виян ончыктышо йоча-влак ушненыт. Нуно Башкортостан, Мордовий, Удмуртий, Хант-Манси да моло финн-угор кундемла гыч толыныт. Марий Эл деч ты лагерьыште Оршанка районысо Великополье школын «Шонанпыл» фольклор ансамбльже да Марий Элысе районла гыч мер илышын ончылеҥже-влак канат. Смена Йошкар-Ола воктене «Кооператор» лагерьыште, Шап ер серыште эрта. Йоча-влак финн-угор калыкын тӱвыраже, йӱлаже, йылме ойыртемже дене палыме лийыт, тыгак финн-угор-влакын кидпашыжым ышташ тунемыт, калык модышышто, тӱрлӧ таҥасымаште шкеныштым тергат. Самырык лидерым вияҥдыме сомылымат йоча-влак дене кугыеҥ-влак эртарат. Лагерьын девизше «Финн-угор тый да мый».

Марий самырык театр у тургымлан ямдылалтеш. Кызыт артист-влак кок у пьеса дене пашам ыштат. Тиде Александр Пушкинын «»Руслан да Людмила» поэмыже да татар драматургын марлашке кусарыме «Чодраял Элександр» спектакльже-влак. «Руслан да Людмила» поэмым Москва гыч Ирина Китаева шында. «Чодраял Элександр» спекатльым марий самырык театр уста актер Андрей Андриановын 70 ийжылан пӧлекла. Сценыште ты пашам ноябрь тылзыште ужын кертына. Лач тунамак самырк театрыште марий артист Андрей Андияновын лӱмгечыжым палемдаш тӱҥалыт. Марий самырык театрыште у тургымышто Сеҥымаш кечылан пӧлеклалтше пьеса, да Александр Петровын «Вашлий мыйым шочмо элем» пьесыж почеш шындыме спектакль кӱын шушаш улыт. У тургым тений октябрь тылзыште почылтеш. Тений тудым кодшо ийысе премьера - Валерий Григорьевын «Ава шӱм» спекталь дене почаш шонат.

Марина Глушкова